Tuvisako ABLEEa legez kanpokotzat jo du Lan Arloko Epaitegiak

Erredakzioa 2020ko mai. 28a, 17:17
Lan Arloko Epaitegiaren epaia agerraldi batean plazaratu dute sindikatuek. / ELA SINDIKATUA

Gasteizko Lan Arloko 2. zenbakiko Epaitegiak legez kanpokotzat jo du Tuvisak gidari-hartzaileei aplikatu dien ABLEEa. Langileen batzordeak zuzendaritza kargutik kentzea eta espedientea bertan behera uztea eskatu du.

Udal gobernu-taldeak (EAJ-PSE) bultzatu zuen aldi baterako lan erregulazio espedientea (ABLEE), konfinamenduaren ondorioz hiri-autobusen erabilera %90 baino gehiago jaitsi zelako. Langileei %30eko soldata murrizketa aplikatu zitzaien.

Tuvisak ABLEEa aurkeztu zuenean, ELA, CCOO, UGT, USO, ESK eta LAB sindikatuek osatutako enpresa batzordeak legezkotasunari buruzko zalantzak plazaratu zituen, eta gora jotzeko errekurtsoa aurkeztu zuen; ondoren, demanda judiziala ere aurkeztu zuen gatazka kolektibo gisa.

Nagusiki aurrekontu publikoarekin finantzatzen den enpresa publikoa dela izan da alegazioen oinarria: gisa honetako enpresek ezin dute ABLEE bat ezarri. Batzordeak salatu duenez, enpresak Lan Ikuskariaren aurrean esan zuen gehienbat txartel eta aparkalekuen salmentetatik lortutako diruarekin finantzatzen del; azkenik, Lan Arloko Epaitegiaren epaiak arrazoia eman die langileei, eta espedientea "justifikaziorik gabekoa" dela ebatzi du.

Enpresa batzordeak Tuvisari eskatu dio ABLEEa bertan behera utz dezala eta ohiko zerbitzuen %100era "berehala" itzul dadila, herritarrei eragozpenik ez eragiteko eta egoera ekonomikoa arintzeko. "SEPEra desbideratzen saiatu diren soldata guzti-guztiak ordaindu beharko baitituzte", adierazi dute langileek. Enpresaren kontuak "hondatuta" daudela ohartarazi dute, azken urteetan udal-gizartea egindako "kudeaketa negargarriaren" ondorioz.

"Argi daukagu enpresako zuzendaritza osoa berehala kargutik kentzeko eskatzea beste irtenbiderik ez dagoela, Kontseiluko presidentea eta Sozietateko gerentea barne", exijitu du enpresa batzordeak.

Hitzarmen kolektiboa

Tuvisa izan da bere langileei ABLEE bat aurkeztu dien EAEko garraio publikoaren sektoreko enpresa bakarra dela ziurtatu dute langileen ordezkariek: "SEPEren bidez bere gastuen finantzaketa legez kanpo bilatzen saiatu dira".

Amaia Barredo Administrazio Kontseiluko presidentearen eta Marijo Ajuriaguerra udal sozietateko gerentearen jarrera salatu dute: "Lan-harremanen esparrua eta hitzarmen kolektiboa desegiten saiatu dira", ziurtatu dute.

Gainera, Gorka Urtaran alkateari enpresa batzordearen kontrako "irain eta mehatxu larriak" bota izana leporatu diote, eta gogorarazi egin diote hitzarmen kolektibo hori EAJk, PSEk eta EH Bilduk negoziatu eta adostu zutela, eta, ondoren, Udalean ordezkaritza duten alderdi politiko guztiek berretsi zutela. "Publikoki zuzentzea eta barkamena eskatzea" eskatu diote alkateari.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide