Obraren lizitazio aurrekontua 397.193 eurokoa zen, baina azkenean %6ko jaitsiera eskaini du Campezo enpresak, eta 373.084,27 euroan egingo du obra. Lanak gauzatzeko epea 20 astekoa izango da; hau da, bost hilabete ingurukoa.
Jose Mardones kalean Energiaren Euskal Erakundearen (EEE) ibilgailu elektrikoaren mugikortasun zentroa izandako informazio-bulegoa desmuntatzeko, lekuz aldatzeko eta berreraikitzeko lanak izango dira, gaur egun ez baita erabiltzen.
Mugikortasunaren eta Espazio Publikoaren zinegotzi Amaia Barredok azaldu duenez, sarrerako atea izango da harrera-bulegoa, lorategi botanikora doazen bisitariei ongietorria eta informazioa emateko lekua. Era berean, etorkizuneko parkeko jarduera ludikoak kudeatzeko eta bizikletak alokatzeko gunea izango da, eta erakustareto txiki bat egongo da bertan.
Hirigintza-aldaketak
Olarizuko parkera sartzeko zentroaren instalazioak hirigintza-aldaketak eskatuko ditu inguru hartan. Besteak beste, Olarizu hiribidearen amaieran kale-muturra inguratzen duen espaloia zabaldu egingo da, eta plaza txiki bat sortuko da, eraikinari zerbitzu emateko eta etorkizunean bestelako erabilera batzuk emateko.
Inguruko argiztapena ere aldatuko da: gaur dauden farolak kendu egingo dira, horien ordez zutoin eta proiektoreak ipintzeko.
Hegoaldeko muturrean instalatuko da harrera-zentroa, eta bertan horma bat paratuko da; aldi berean, horma hori esertzeko banku bat izango du, eta Olarizuko lorategi botanikoko sarrera iragartzeko letra eskultorikoen oinarria izango da. Horma zein letrak altzairuzkoak izango dira.
Informazioa eta aisialdi-jarduerak
Harrera-zentroak 200 metro koadro inguru izango ditu, eta oinezkoentzako bi sarbide. Olarizuko lorategi botanikoaren inguruko informazioa eta laguntza zerbitzua eskainiko ditu, eta aisialdi-jarduera osagarriak egiteko lekua izango da: hala nola, landare-labirintoa, tirolina, anfiteatroa edota izadi-jolasak. Halaber, bizikletak alokatzeko lekua ere izango da.
Covid-19ak eragindako egoera dela eta, zentroa sortzeko lanetako batzuk -anfiteatro berdea, adibidez- gelditu behar izan dira, baina datozen asteetan ekingo zaie berriro.