Dena prest dago Batera zaintza sareak deitutako danborrada herrikoirako: Hala Bedi eta Cadena Ser irratietan entzungo dira doinuak, eta 20:30etik aurrera, "zuzenean eta modu koordinatuan", YouTube bidez jarraitu ahal izango da Leire Betolazak gidatutako San Prudentzio bezperako festa.
20:30etik 21:00etara danborra prest izateko, txanoa janzteko, eta zuzeneko emisioa jarraitzeko deia zabaldu du Baterak, "autoantolakuntzaz, auzolanean eta komunitatean" arabarron jai eguna ospatzeko; abestien ordena kontuan hartzeko eskatu dute, eta horretarako zerrenda zehatz bat proposatu dute.
Gainera, egun hauetan tailer eta entsegu telematikoak egin dituzte dena prestatzeko, eta eduki guztiak YouTubeko kanalean kargatuta daude:
- Apirilak 17, ostirala: Nola egin zure danborra.
- Apirilak 20, astelehena: Lehen entsegua Leire Betolazarekin.
- Apirilak 22, asteazkena: Nola egin zure txanoa.
- Apirilak 24, ostirala: Bigarren entsegua.
Azkenik, argazkiak eta bideoak sare sozialetan elkarbanatzeko deia egin dute, @BateraZaindu aipatuz edota #Batera traola erabiliz.
ALEAren jarraipena
San Prudentzioko danborradaren jarraipen bideoa egingo du ALEAk, eta apirilaren 27ko irudiak bilduko ditu. Horretarako arabar guztien laguntza beharrezkoa izango da: bidali zure etxeko danborradaren bideoak eta irudiak ALEAren telefonora (645 66 86 02) edo erredakzioa@alea.eus helbide elektronikora.