Batera: kultur proiektuak elkarrekin deialdiko hiru crowdfunding kanpainak amaitu dira. Otsailaren 20an, Itsulapikoa.eus plataforman, jarri zituzten martxan hiru kultur proiektu gauzatzeko diru-bilketa kanpainak; eta martxoaren 30ean lortu zituzten bere egitasmoak aurrera ateratzeko gutxieneko helburuak. Hain zuzen ere, 3.500€-tik gora izango dituzte proiektuak egin ahal izateko.
Alarma egoerak diru-bilketa kanpainak bete-betean harrapatu baditu ere, Itziar Uriarte eta Irune Zabaletak (banaka) eta Sergio Azkarate, Irati Lekue, Itziar Hormilla, Nefer Olaizola eta Erlantz Mata (taldeka) gazteek ateratako diruarekin olerki-liburu ilustratua, ipuin-liburu multimedia bat eta dokumental bat garatuko dituzte, Bizimundua, Tinta, grafito artean: musak eta Erroak, hurrenez hurren.
Orain sormen lanaren txanda da. Ez-ohiko egoerak utziz gero, ekainaren 23ra arte izango dute lanak gauzatzeko aukera. Denbora tarte horretan, bakoitzak bere lan-katea osatu beharko du, eta ilustratzaile, aktore, zeinu-hizkuntza interprete, bideo-sortzaile eta bestelakoekin bat egin beharko dute egitasmoa elkarlanean garatzeko.
Oihaneder Euskararen Etxeak Itsulapikoa plataformako arduradunaren eta Laboral Kutxa eta Vital Fundazioaren laguntza eskertu nahi izan du.
