Gasteizko mugimendu feministak San Migel elizako balkoia eskatu zuen Martxoaren 8ko mobilizazioen ekitaldi nagusia bertan egiteko. Udaltzaingoak baimena ukatu dio "gune berezia eta sinbolikoa" dela argudiatuta.
Otsailaren 28an, Udaltzaingoaren komisario buruak ezezkoa eman zion mugimendu feministaren eskaerari: "San Migeleko balkonadaren berezitasuna eta sinbolismoa kontuan hartuta, Udalaren Zerbitzu Publikoaren irizpidea da ez baimentzea inolako megafoniarik edo egintzarik", argudiatu zuen idazkiak.
Komisario buruaren arabera, baimendu ohi diren bakarrak "udal jarduerak edo ekitaldiak" dira. Baina EH Bilduk arbitrariotzat jo du Udaltzaingoak hiriko mugimendu feministaren eskaria ukatu izana.
Rocio Vitero zinegotziak gogorarazi du Andre Maria Zuriaren balkoia erabiltzeko baimena izan dutela, besteak beste, Baskoniari zein Alavesi egindako harrerek, edota Korrikaren amaierako ekitaldiak.
"Mugimendu feministari ez zaio baimenik eman espazio publiko hori erabiltzeko hain berezia den Martxoaren 8an", salatu du Viterok, eta erabakia berrikustea eskatu dio udal gobernuari.
Halaber, mugimendu feministaren lana ez oztopatzeko eta azken ekitaldia baimentzeko eskatu dio EH Bilduk udal gobernuari, "Gasteizko mugimendu feministak eskatu bezala, ekitaldiak San Migeleko balkoian amaitu ahal izateko".