Gasteizko Udaltzaingoak dosierra ireki dio Estarroako abeltzaintza ustiategi bati, hilaren hasieran erreten batera mindak isurtzea egotzita.
Herritar baten deiaren bitartez jaso zuten isuriaren berri, otsailaren 5ean, erreten bati kiratsa zeriola eta. Bertaratu zirenean, agenteek egiaztatu zuten isuriaren jatorria gertuko abeltzaintza ustiategi batean zegoela, eta lurpetik zetorren hodi baten bitartez iritsia zela.
Halakoetan eskumena duen URA agentziari eman zioten horren berri, laginak har zitzan. Udalak zabaldutako informazioaren arabera, animalien gernua eta gorotzak ez ziren iritsi erretenaren amaieran dagoen ibaira, eta hurrengo egunean bertan erretena garbituta omen zegoen. Gertakariaren harira, URAk ikerketa bat abiatu du.