CIC Energiguneko lau emakume ikerlari Inspira STEAMeko emakume mentoreen taldean sartu dira. Modu horretan, proiektuan parte hartzen duten neskei lanbidearen errealitatea helaraziko diete, emakume ikertzaileen ikuspegitik.
Neskato eta neska gazteen artean zientziarekin eta teknologiarekin erlazionatutako ikasketen aurreko interesa sustatzeko sortua da Inspira STEAM, Deustuko Unibertsitatearen ekimenez. Horretarako, urtean zehar, ikastetxeetan hainbat hitzaldi antolatzen dituzte. Hitzaldi horietan, neskek zientzia eta teknologiaren alorreko ogibideetan emakumeek duten presentzia ikusteko parada dute, beti ere jardun horretan ari diren ikertzaileen eskutik, zuzen-zuzenean.
CIC Energiguneren kasuan, Laura Acebo, Maica Morant, Maria Angeles Moreno eta Iciar Monterrubio izango dira neskei zientzia eta teknologia hurbilduko dizkieten ikertzaileak.
Berehalako helburua "ikasketa teknologikoetan hautematen den emakume ikasleen beherakada geldiaraztea da", ikerketa-zentroak ohar baten bidez adierazitakoaren arabera. Aipatu dutenez, estatuko unibertsitate sistemako ikasle guztien %54 dira emakumeak, baina Ingeniaritza eta Arkitektura titulazio teknikoetan duten presentzia %26 baino ez da.