Ilara luzeak sortu dira gaur haur-txekea eskatzeko Gasteizen. 2019ko urtarrilaren 1etik abenduaren 31ra bitartean jaiotako seme-alabak dituztenek eta Araban urtebete baino gehiago daramatenek dute diru-laguntza eskatzeko aukera.
Arabako Batzar Nagusiek onartutako foru arauaren arabera, jaiotza bakoitzeko 1.000 eurorainoko laguntza zuzenak emango zaizkie familiei, sarrera gordinen arabera. Eskaera fisikoa egiteko ordutegia 09:00etatik 15:30era da, Gizarte Ongizaterako Foru Erakundeak (Jesusen Zerbitzarien kalea, 5) duen jendearen arretarako bulegoan. Martxoaren 10ean amaitzen da eskaera egiteko epea. Internet bidez ere egin daiteke eskaera, eta horretarako ziurtagiri elektronikoa behar da.
Azken urtea da txekea banatzen dela, EAJren eta PSEren foru gobernuak 2020an jaiotakoentzat diru-laguntzarik ez dela izango onartu ostean.