BERRIAn irakurritako pasarteak abiapuntu hartuta, gaizki-ulertuen beste leiho bat ireki dute Oihaneder Euskararen Etxean. Bihar, hilaren 7an, Basque misreadings. BERRIAn gaizki irakurriak erakusketa aurkeztuko dute Euskararen Etxeko erakusketa aretoan, 19:00etan, eta otsailaren 23ra arte izango da ikusgai.
Hitzekin jolastu dute Edu Zelaieta idazleak eta Eneko Ugarte artistak elkarlanean, eta BERRIA egunkarian gaizki irakurritako albisteekin osatu dute erakusketa. Bi urte eta erdiko denbora tartean argitaratutako testuez baliatuta, gai ezberdinak, ahots ezagunak eta ez hain ezagunak hartu eta literatura-komunikazioa eta arte plastikoak uztartzen dituen diziplinarteko proiektu bat osatu dute. Bi sortzaile gasteiztarren helburua ez da, ordea, irakurritakoak zuzentzea, baizik eta horiek ikustean gogoak nora eramaten gaituen erakustea.
Literaturaren eta plastikotasunaren ikuspegian oinarrituta, hiru atalek osatzen dute proiektua: ilustrazioa, kromatismoa eta hiru dimentsioko sorkuntzak. Elementu horien bidez, misreading kontzeptuaren prozesua islatu nahi izan dute, forma ezberdinak sortzeko, eta baita ikuspegi kritikoa, erreflexiboa eta umorezkoa agerrarazteko ere.
Gonbidatu bereziak izango dira ostiraleko aurkezpenean: Ane Gebara ipuin kontalaria eta Beñat Goitia sortzailea. Bi partaide horien laguntzari esker, antzezpen ikutua emango diote ekitaldiari, eta ahozkotasunak eta soinuak bat egingo dute papera eta tintarekin. Horren ondoren, gerturatzen direnek aukera izango dute sortutako piezak ikusi, ukitu eta proposatutako jolasean murgiltzeko.