Manuel Iradier kaleko zein Gasteizko hegoaldeko zati handi baten isuriak biltzen dituen saneamendu-kolektore zahar bat aldatzeko lanetan ari dira, eta Amvisaren obrak Florida parkearen inguruan garatuko dira urtarrilaren 20tik aurrera.
Adriano VI, Luis Heintz, Ramon y Cajal, Senda Ibilbidea eta Manuel Iradier kaleetako saneamendu eta hornidura sarea berritzeko obren artean kokatzen dira lan hauek. Obrek aurrera egin ahala, hainbat aldaketa eragingo dituzte Arabako hiriburuaren trafikoan.
Hilaren 20tik aurrera eta baita otsailean zehar ere, zirkulazio aldaketak aurreikusi dituzte Senda Ibilbidearen inguruan eta Florida, Iradier eta San Antonio kaleetan. Urtarrilaren amaierara arte, Senda Ibilbidetik Manuel Iradier kalerako ibilgailuen sarbidea moztuko dute; zirkulazioaren noranzkoa aldatuko da San Antonio kalean, Florida eta Manuel Iradier artean.
Amvisak aldaketen inguruko informazioa helarazi die inguruko bizilagunei; bestalde, Udalak zonaldean ibilgailu pribaturik ez erabiltzea gomendatu du.