Joan den hilean Forondako aireporturako lehiaketa kaleratu zuen VIAk, eta enpresa bakarra aurkeztu zen. Ondorioz, Binter airelineak kudeatuko ditu Kanaria Handiko eta Tenerifeko loturak 2020. urtean. Erakundeek 220.000 euro ordainduko diote enpresari hegaldi horiengatik eta bertako turismoa uharteetan sustatzeagatik.
Hegaldi erregularrak apirilaren 1etik aurrera egongo dira martxan. Hegaldi berriek astean bitan -egun bat irla bakoitzeko- lotuko dute Arabako hiriburua Kanaria uharteekin, hiru ordu inguruko ibilbideekin.
140 bidaiari ingururentzako lekua daukan Embraer E195-E2 hegazkin ereduarekin egingo du hegan Binter enpresak.
Mugimendu ekologistak kezka agertu du
Gasteizko Fridays for Future mugimendu ekologistak kritikatu ditu Gasteizko Udalak, Arabako Foru Aldundiak eta Eusko Jaurlaritzak eskainitako diru laguntzak. "Hegazkina garraiobide kolektibo kutsakorrena da ikerketa guztien arabera", azaldu dute.
Halaber, "koherentzia falta" leporatu diete erakundeei. Izan ere, duela gutxi klima larrialdia deklaratu dute Eusko Jaurlaritzak eta Gasteizko Udalbatzak. Foru Aldundiaren kasuan, klima aldaketaren aurka adierazitako konpromezuarekin bat ez datorren erabakia dela adierazi diote Ramiro Gonzalezi: "Diru hau garraio publikoa hobetu eta merketzeko erabili ahalko lukete, adibidez".