Badok atariak zehaztu du azken aldian zurrumurrua zena: "Duela egun batzuk jakin genuen Sexty Sexers itzultzekoa zela aurten, eta gaur ezagutu dugu noiz izango den".
Musikari buruzko webgunean argitaratu duten bezala, biraren izena Beltza, Iluna eta Sakona Tour 2020 izango da, eta taldeak hiru kontzertu egingo ditu horren barruan: Gasteizko hitzorduaz gain, Gernikan eta Hondarribin izango dira, apirilaren 4an eta 24an, hurrenez hurren.
Berako (Nafarroa) taldeak Hero Mantra azken diskoa kaleratu zuen duela hamaika urte; eta duela sei urte eman zuen azken kontzertua. Geroztik, Zakillers, Joseba B. Lenoir edo Mutürbeltz bezalako proiektuak martxan jarri dituzte taldekideek. Martxoaren 14an izango dira bueltan, Gasteizko Muinoko Etxean.
Urtarrilaren 31n, Lepora eta Lisabö
Horrez gain, urtarrilaren 31n Lepora eta Lisabö taldeek eskainiko dute Muinoko Hotsak egitasmoaren urteko lehen kontzertua.
Lepora talde gasteiztarra Kashbad, Iont, Same Old eta Libe taldeetan aritutako hainbat musikarik sortu duten proiektu berria da.
Bestalde, Lisabö 1998an sortu zen Irunen eta post-rock soinuetatik gertu dabilen rock esperimentala eramango dute oholtza gainera.