Antolatzaileen arabera, bost mila lagunek parte hartu dute gaur goizean Gasteizen deituta zegoen pentsio duinen aldeko manifestazioan. Bi zutabe abiatu dira, 10:00etan, Europa jauregitik bata eta Iparralde gizarte-etxetik bestea, eta Katedral Berrian egin dute bat. Bitartean, pentsionisten ordezkariak Eusko Legebiltzarrera hurbildu dira.
Arabako, Bizkaiko eta Gipuzkoako pentsiodunen elkarteek Eusko Legebiltzarrari eskatu diote ekimen legegile bat aurkeztu dezala Espainiako Diputatuen Kongresuan, gutxienez 1.080 euroko pentsioak bermatzeko eskatuz. Urtarriletik aurrera talde politiko guztiekin bildu nahi dute ekimen legegilea prestatzeko.
Amaiera ekitaldian pentsio duinen alde borrokan jarraituko dutela berretsi dute, eta urtarrilaren 30erako Eskubide Sozialen Kartak deitu duen greba orokorrean parte hartzeko deia luzatu dute.