Piko Zulueta argazkilari gasteiztarrak Basoratu izeneko erakusketa aurkeztu du Artgia sorgunean: hogei argazkiz eta mosaiko erraldoi batez osatuta dago.
Argazkigintza sorkuntza garaikidea eta Shinrin Yokua (basoan ibiltzea eta gure zentzumenen bitartez naturarekin konektatzean datzan jardunbide japoniarra) bateratzen dituen proiektua da honako hau. Argazkilariaren esanetan, zenbait bizi-beharrei erantzuten dio, hala nola, eguneroko erritmoa moteltzeari, gelditzeari eta bide batez gure bizimoduaren inguruan gogoeta egiteari.
Proiektu horren jatorria basoan bizi izandako zentzumen-bizipenetan eta ondorioz izandako erantzun emozionaletan dagoela azaldu du Zuluetak, eta ildo horretan, bisitariak gogoeta egitera gonbidatzen ditu, eta, aldi berean, pentsamendu kritikoa eta gizakion ahalduntzea sustatzera.