Genero indarkeria

Bi gizon atxilotu dituzte kalean bikotekideei eraso egiteagatik

Gasteizko Mugimendu Feministaren mobilizazioa, eraso matxisten aurka. / Argazkia: Alea

Gasteizko Udaltzaingoak 28 eta 35 urteko bi gizon atxilotu zituen atzo, azaroaren 17an, genero-indarkeriako delitu bana egotzita, bide publikoan bikotekideei eraso egiteagatik.

Lehenengo esku-hartzea 07:00ak aldera izan zen. Patruila batek bikote bat ikusi zuen Frantzia kalean, eta, une jakin batean, gizonak emakumea bultzatu eta lurrera bota zuen.

Agenteak ibilgailutik jaitsi ziren eta, gertatutakoa argitzeko gerturatutakoan, gizonezkoak haietako baten aurka egin zuen. Atxilotu ondoren, epailearen esku utzi zuten 28 urteko gizona.

Ordu batzuk geroago, udaltzainek bigarren gizonezkoa atxilotu zuten emakume bati eraso egin ziola jakin ostean; 092 telefonora egindako dei bati esker atxilotu zuten 35 urteko gizona.

Emandako deskribapenari esker, agenteek erasotzailea aurkitu zuten Nueva Fuera kalean, eta handik ihes egiten saiatu zen, baina ez zuen lortu. Gaur goizean eraman dute epailearen aurrera.

Beste patruila batek lagundu zion emakumeari Agirrelandako egoitzara, salaketa jartzeko.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide