Koldo Mitxelenako hainbat irakasleren lan boluntarioari esker, auzolanean, euskarazko eduki zabala eskegi dute Oroimenaren Harra webgunean. Proiektua ikastetxe honetan jaio den arren, "guztiontzat irekia" izatea nahi dute.
Horretaz gain, Euskal Herrian egin diren lan asko gune bakar batean biltzea erabaki dute, hezkuntzan lanean ari direnek oroimen historikoa eskolara eramatea "errazago" izan dezaten.
Bertan, oroimen historikoarekin zerikusia duten tresna ezberdinak daude eskuragarri. Besteak beste, unitate didaktikoak, testuen lanketarako bitartekoak, baliabide historikoak edota oroimen historikoa lantzen duten webguneen loturak.
Transmisioa, belaunaldi ezberdinak lotzeko
Egitasmoaren sustatzaileek azaldu dutenez, irakasleen artean gai honen inguruko "kezka nabarmen handitu da", ikasleek gero eta gutxiago ezagutzen baitute "aurreko belaunaldiek 1936ko gerran eta Francoren diktaduran bizi behar izan zutena".
"Garai horretan gertatutakoak isilarazi edo ezkutatu beharrean, orainera ekartzeko beharra ikusi dugu"
Hortaz, haien helburu nagusia hezkuntzaren bidez, belaunaldi berriek "iraganean isilarazi eta ezkutatu zuten horren inguruko egia" ezagutzea eta bilatzea da. Horretarako, ezinbestekotzat jo dute hezkuntza komunitatearen inplikazioa.
"Belaunaldiz belaunaldi, transmisio bidez jasotakoaren ondorioz, garai horretan gertatutakoak isilarazi edo ezkutatu beharrean, orainera ekartzeko beharra" ikusi dute irakasle hauek. Transmisioa garai ezberdinak lotzeko balio duen katea dela azpimarratu dute, "garai ezberdinetako katebegiak lotzen dituena".
