Ekitaldian, sari-ikurrak banatu ziren eta lau lan irabazleen egileek bidaien azalpen laburrak eman zituzten. Horrez gain, lau pantaila digitaletan gainontzeko bidaien 12na argazki ikusgai izan ziren Oihaneder Euskararen Etxeko Jovellanos aretoan.
Maroko, Argentina, Vietman eta Bielorrusiako argazkiak izango dira koadroetan eta munduko beste hamaika tokitako argazkiak ikusteko aukera ere izango da pantaila digitaletan, antolatzaileek azaldu duten bezala.
Erakusketaren ordutegia 11.00etatik 14.00etara eta 18.00etatik 21.00etara izango da asteartetik larunbatera. Igandetan, ordea, soilik goizez egongo da zabalik, ordutegi berean. Astelehenean, itxita egongo da.
Erakusketarekin batera, argazkietan jasotako bidaien aurkezpen publikoak egingo dira urrian zehar, txoko ezberdinetan:
- Urriak 21, 19:00: Bidaia Argentinan (Ania Fernandez de Ganboa) – Zabalgana Gizarte Etxean (Zabalgana)
- Urriak 23, 19:00: Hmong beltzak (Alicia Jimenez eta Diego Gomez) – Koxka taberna (Salburua)
- Urriak 27, 19:00: Memento bat Bielorrusian (Aitor Salazar) – Orient Express taberna (Txagorritxu)
- Urriak 28, 19:00: Kaosean ordena (Idoia Ugalde) – Dazz taberna (Alde Zaharra)
Guztira 15 lan aurkeztu dira lehiaketara, 300 argazki inguru, eta epaimahaiak saridunak aukeratzea "oso zail" izan duela azaldu du.
Gasteizko euskalgintzako elkarte desberdinetako kideek osatu dute epaimahaia: Zabalganako Euskara Taldea, Sarburu elkartea, Gauekoak, Zizta Euskara Taldea eta GEU elkartea.