Gasteizko Udaltzaingoak lau gizonezko atxilotu ditu, azken egunotan, genero indarkeriagatik. Ostiralean, 19 eta 23 urteko bi mutil atxilotu zituzten; bat Zaramaga kalean, autobus-markesina batean emakume bati eraso egin ondoren; eta bestea, Sansomendi auzoko bere etxebizitzan, bikotekideari eraso egiteagatik.
Larunbatean, berriz, 49 urteko gizonezko bat atxilotu zuten poliziek, bere bikotekidea labanaz zauritzeagatik. Gamarrako Atea kalean jaso zen erasoa. Gizonak emakumeari laban batekin mehatxu egin zion eta zauri txiki bat eragin zion ere esku batean. Poliziek ospitalera eraman zuten biktima, eta ondoren, Agirrelandako polizia-etxera, zegokion salaketa jar zezan. Atxilotua epailearen esku jarri zuten.
Azkenik, igandean goizean, poliziek 25 urteko gazte bat atxilotu zuten, amari eraso egiteagatik. Larunbatean arratsaldean eraso egin omen zion semeak amari; eta emakumeak igandean goizean, gaztea lanera joan zela aprobetxatu zuen, 092 zenbakira deitzeko. Ondoren, salaketa jarri zuen semearen kontra, Agirrelandan. Udaltzainek erasotzailea atxilotu zuten.
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Espainiako estatuan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.