Getxoko musikagile Fernando Velazquezen zuzendaritzapean, mila lagun inguru igoko dira irailaren 14an, Buesa Arenan egokituko duten agertokira, Humanity at Music izeneko ikuskizunaren barruan. Besteak beste, Euskadiko Orkestrak; Kukai dantza taldeak; Pirritx, Porrotx eta Marimotots pailazoek, Euskal Herriko bertsolari aipagarrienek eta hainbat abesbatza eta dantza-eskola nahiz elkartetako 500 lagunek parte hartuko dute, eta baita Gasteizko Jose Uruñuela Udal Dantza Kontserbatorioa ere.
Ekitaldi nagusia 18:00etan hasiko da. Artistak, eszenografia, 3D proiekzioak, soinu eta argi-diseinuak uztartuko dituen nahasketa ikusteko aukera izango da bertan. Ikuskizunak Fernando Velazquezek konposaturiko eta Jon Sarasuak idatzitako sinfonia kooperatiboa izango du ardatz; guztira, zortzi piezez osatuta egongo da.
Baina, kontzertuaz gain, bestelako ekintzak ere izango dira egun osoan Buesa Arenaren kanpoaldean. Eguerdian, tailerrak, jarduerak eta erakusketak egongo dira. Eta ikuskizuna amaitzean, amaierako festa bat egingo dute. Gainera, egun osoan zehar food truckak egongo dira ingurunean edari eta janari artisauarekin.
Sarrerak dagoeneko salgai daude proiektuaren webgunean (www.humanityatmusic.com), prezio eta modalitate desberdinekin.