Gasteizko Udalak Bizileku zerbitzua martxan jarri du, turistei bizikletak alokatzeko. Florida parkeko Txorolekuan bi bizikleta elektriko, hamar bizikleta arrunt eta tandem bat izango dituzte aukeran. Proba moduan, urrira arte funtzionatuko du Bizilekuk.
Capital Bikes enpresari esleitu dio kontratua Udalak, hain zuzen Olarizuko etxaldean 2017az geroztik bizikletak alokatzen dituen enpresari. Hala, Floridako eta Olarizuko guneetara jotzen duten lagunei aukera emango zaie bisita gidatuak egiteko Eraztun Berdean, hiriko parkeetan, Olarizuko lorategi botanikoan, hirigune historikoan, Estibalizen… Txangoak eskainiko dituzte ere Lautadan zehar, bide berdeen erabilera sustatzeko.
Alokairuaren barruan sartuko dira hiriaren mapa, erantzukizun zibileko asegurua, giltzarrapoa, txaleko islatzailea eta laguntza mekanikoa.