Astearte goizean langile bat hil zen Arbizun (Nafarroa). Lakber Mecanizados enpresan ari zen lanean, eta makina batek harrapatuta zendu zen. Langileak 35 urte zituen eta Etxarri Aranatzen bizi zen, baina gasteiztarra da.
Lakber enpresa Lakuntzakoa da, baina Arbizun ere badu lantegia. Sakana Kooperatibako kide da enpresa hori.
LAB sindikatuak salatu duenez, Euskal Herrian aurten hil den 27. langilea da; bederatzigarrena Nafarroan. Sindikatuak ezbeharrari lotutako "zirkunstantzia guztiak" argitzeko eskatu die erakundeei eta enpresako arduradunei. Sindikatuak gaineratu duenez "bereziki kezkatzeko modukoa" iruditzen zaio gertatutakoa, "gaurkoa Sakana S.Coop enpresak dituen lantegietan azken lau urteetan hil den hirugarren langilea" delako.