Manuel Iradier txangolari elkarteak eta Vital fundazioak antolatutako Gasteizko Mendiak probak datorren larunbatean, hilaren 15ean, izango du hitzordua. Goizeko seietan hasiko da Uribarri-Jauregitik eta, Gasteizko Mendiak zeharkatu ondoren, Cervantes pasealekuan izango du amaiera.
Hala, fondo handiko lasterketaren XII. edizioan parte hartzeko 1.113 lagunek eman dute izena. Korrikalariek Itxogana, Indiagana, Arraialde, Almurrain, Kapildui, Zalbizkar, Lendiz, Arrieta, Zaldiaran, Busto eta Ezkibel tontorrak egingo dituzte. Lasterketa hasi baino berrogei minutu lehenago, hainbat autobusek eramango dituzte partaideak lehiaketaren irteera lekuraino, Mendizorrotza estadioaren alboan. Ibilbidea osatzeko denbora 20:00etan amaituko da.
Gasteizko hegoaldean egingo den proba etapa bakarrean garatzen da. Gailurren altuera xumea bada ere, metatzen den desnibela 5816 metrokoa da eta 62 kilometroko distantzian zehar banatzen da. Hortaz, desnibel horrek gogortasun nabarmena ematen dio probari.
Sortu zenetik, 1997. urtean, Euskal Autonomia Erkidegoko eta Estatuko mendi-proba ezagunenetarikoen artean finkatuz joan da. Hala, Euskal Herritik etorritako korrikalariez gain, beste erkidego eta herrialde batzuetakoak ere erakarri ditu lasterketak.
Apuntatzeko kupoa hiru ordutan bete zen, izena emateko epea ireki zen egunean bertan.