San Prudentzio jaiekin batera, hitzordu berezia izaten da Gasteizen. Lakua-Sansomendiko gizarte etxeko igerilekuan, larunbatean, hilaren 27an, VI. Ur Azpiko Hockey Txapelketa jokatuko dute. Nereida Hockey talde gasteiztarrak antolatuta, 12:00etatik 21:00etara, estatuko eta Frantziako taldeek parte hartuko dute.
1950. hamarkadan eman zen ezagutzera ur azpiko hockeya, Ingalaterran, eta gaur egun hainbat herrialdetan da ezagun. Kirol honek 1,3 kiloko berunezko diskoa aurkariaren atean ahalik eta gehienetan sartzea du helburu; horretarako, 25 zentimetro inguruko stick baten laguntza dute jokalariek. Jokatzen duten bitartean, arnasa mantendu behar dute jokalariek, urpeko betaurrekoak, tutua eta hegatsak bakarrik erabili daitezkeelako.
Nereida Hockey Sub taldea izen bereko urpekaritza taldearen parte da. Euskal Herriko ur azpiko hockeyeko talde bakarra da, bai eta estatu osoko gutxietako bat. Adin guztietako jendeak parte hartzen du bertan: adin txikikoetatik 50 urtetik gorakoetara, neskak zein mutilak.