Hiesaren aurkako Herritarren Batzordeak (Sidalava) urtebetez kudeatuko du gizarte-bazterketako egoera larrian dauden pertsonak laguntzeko helburua duen Kaleko Heziketarako Udal Programa. Udalak 94.550 euro bideratuko dizkio Sidalavari programa gauzatzeko.
Urtean 350 bat pertsonari ematen die laguntza zerbitzuak; Hurbil taldeko bi gizarte-hezitzaile, psikologo bat eta gizarte-lana arloko hiru profesional ditu zerbitzuak. Kaleko Heziketa programaren barruan artatzen diren pertsonek bilakaera luzeko egoera kronifikatuak eduki ohi dituzte. Etxebizitzarik, baliabiderik eta laguntza-sarerik gabeko pertsonak izan ohi dira, eta gizarte-zerbitzuen intentsitate handiko esku-hartze etengabea behar izaten dute.