Principal antzokian aurkeztuko duten Vitoria-Gasteiz sinfoniarekin amaituko dira San Prudencio Fundazioak bete dituen 50 urteko ospakizun ekitaldiak. Juanjo Mena orkestra zuzendariak zuzenduko du Bingen Mendizabalek eta Ruper Ordorikak sortutako obra.
Fundazioa Juanjo Menarekin jarri zen harremanetan, eta ideia hau azaldu zion: Beethovenek 1813an Napoleonen soldaduen kontra borrokatutako Gasteizko Bataila gogoratzeko konposatu zuen sinfoniaren "kontrapuntua" izango zen beste bat hiriari eskaintzea.
Bingen Mendizabalek egin du partituraren konposizioa, Ruper Ordorikak abesbatzaren letra landu du, eta Kike Suarez-Albak elektroakustikako elementuak. Juanjo Mena maisuaren zuzendaritzapean, Camerata Gasteiz taldea osatu dute, 60 musikariren parte-hartzearekin, Jesus Guridi musika kontserbatorioarekin elkarlanean.
Aurkezpena gaur egingo dute, Principal antzokian, 20:00etan.