Gasteizko ikasleak mobilizazioak egiten ari dira gaur, "krisi klimatikoaren aurkako ekintza politikoa" eskatzeko. 13:00etan kontzentrazioa egin dute, udaletxearen aurrean, eta 18:00etan manifestazioa egingo dute, Andra Maria Zuriaren plazatik.
Aste honetan bertan NBE Nazio Batuen Erakundeak salatu du estatuak ez direla norabide horretan indar egiten ari. Horregatik, estatuak mugiaraztea dute helburu gaurko deitutako greba eta mobiliazioek.
Estatuan indarra hartzen ari da Fridays For Future mugimendua, bereziki, Madrilen, Bartzelonan eta Valentzian. "M15 klimatikoa" deitu diote ikasleek mugimenduari, eta hainbat herrialdetan mobilizazioak egiten ari dira, urtarriletik hona. Ildo horretan sortu da ere Frydays for Future Gasteizko batzarra, hiritarrak aldaketa klimatikoaren inguruan batzeko eta mobilizatzeko.
Mugimendu berriak salatu du Gasteizko "green erretorika hutsala", eta nabarmendu du aldaketa klimatikoaren kontra hartzen diren neurriak "kosmetikoak" direla, eta egitasmo estrategikoek iraganeko eskematan oinarrituta jarraitzen dutela. Frydays for Future taldearen ustetan, horren adibide dira AHT bezalako azpiegitura handiak edo gas ez konbentzionala ustiatzeko Armentia-2 asmoa.