Metro batzuetako altueratik erori da Juan Vallejo eskalatzaile gasteiztarra, kirol eskalada egiten ari zela, El Chalten herriaren inguruan (Argentina). Mikel Zabalza lagunak adierazi duenez, arriskutik kanpo eta kontziente dago Vallejo, baina pelbisa eta izterrezurra hautsita ditu, eta kolpe larriak gorputzean. El Calafateko ospitalean ebakuntza egin ostean, Gasteizera itzultzea espero dute.
La Platea izenez ezagutzen den inguruan izan du istripua Vallejok, Argentinako Patagonian. El Chalten herritik hamar bat kilometrora dago eremu hori.
Istripuaren aurretik Cerro Torre mendian izan ziren –Hego Patagoniako izotz zelaian– Vallejo eta beste kide batzuk, tontorretik gertu (3.133 m).
Azken urteetan, besteak beste, Wopeak proiektuan aritu da Vallejo, Alberto Iñurrategirekin eta Mikel Zabalzarekin batera. Gasherbrum I (8.080 metro) eta Gasherbrum II (8.034 metro) mendiak lotzea zuten helburu, estilo alpinoan, kanpaleku nagusira jaitsi gabe eta ohiko ibilbidetik kanpo. Azkenean ez zuten lortu, haize bortitzaren ondorioz.