Berdearaba erakusketa ireki berri dute Gasteizko Independentzia kalean, Araban sustatutako hamar jarduera berriztatzaile eta jasangarri irudietan jasotzen duen erakustaldia hain zuzen. Proiektua Fotogasteiz argazkilarien elkarteak garatu du, eta martxoaren 10era arte egiten ari den Asteklima Euskadiko Klima-aldaketaren astearen jardueretako bat da. Erakusketa martxoaren 9ra arte Independentzia kalean izango da; gero, Loma jeneralaren plazara eramango dute, eta bertan izango da martxoaren 14ra arte.
Hamar erakusketa-taula biltzen ditu argazki-erakusketak. Toloño mendilerroko tradiziozko erlezaintza jasangarria Javier Gonzalez de Martinen eskutik ezagutzeko parada dago. Sasoiko nekazaritza ekologikoa, berriz, Bionekazaritza Arabako Nekazari eta Abeltzain Ekologikoko elkartearen eskutik. Bitartekaririk gabeko abeltzaintza ekologikoa Añanako Kuadrillako Villambrosa herriko Alfredo Alonsoren irudiarekin ordezkatuta dago; zortzi urtez behiak eta behorrak hazarazten diharduen abeltzaina. Añuako Iñaki Ezeizaren irudia ere jaso dute, ahuntz-esneaz egindako artisau gaztandegia duen ganaduzalea. Gasteizko Jundiz industriaguneko A&B Laboratorios de Biotecnologiaren bitartez, berriz, industria-ekologia proiektua bat ezagutarazten da. Halaber, Geograma enpresako langileen artean, CO2 isuriak murrizteko bizikletaren erabilera sustatzeko agertzen da erakusketan. Samaniegoko Ostatu upategiak ardo-upategi ekologikoaren laborea erakusten du, Gesaltza Añanako gatzaren ekoizpen tradizionala ere bildu dute, Artefruta fruta-dendaren plastiko gabeko komertzioa, eta azkenik, Araiako Bioarkitektura enpresa.