Martxoaren 1etik aurrera, TAO zerbitzua telefono mugikorraren bidez ordaindu ahal izango da Gasteizen. Modu horretan, erabiltzaileek ez dute parkimetroraino joan behar aparkatzeko txartela eskuratzeko, eta, gainera, aukera izango dute euren ibilgailua aparkatuta egon den denbora bakarrik ordaintzeko.
Hala, ordaintzeko nahikoa izango da Telepark izeneko doako aplikazioa deskargatzea, Play Store eta App Store plataformetan. Aparkatzeko txartela erosteaz gain, erositako epea luzatzeko aukera ere eskainiko du metodo berri honek. Gainera, baimendutako denbora gainditzeagatik salaketa baliogabetzea edo ordainketa-egiaztagiria lortu ahal izango da mugikorraren bitartez. Gainera, erabiltzaileari alerta bat bidaliko dio erositako denbora bukatzear dela ohartarazteko, baita salatu dutenean ere. Doako 15 minutuak erabiltzekotan, baina, parkimetroan ohiko tiketa hartu beharko dute erabiltzaileek.