Euskara ikastaroak egiteko 500.000 euro zuzendu ditu Udalak

Euskara ikastaroak egiteko 500.000 euro zuzendu ditu Udalak
Gizarte etxeetan egiten diren ikastaroak dira. ALEA

Udalak milioi erdi euro bideratuko ditu gurasoentzako, 55 urtetik gorakoentzako, merkataritza eta ostalaritzako langileentzako eta atzerritarrentzako.

Gasteizko Udalak 500.000 euroko aurrekontua bideratu du, Euskara Zerbitzuak antolaturik,  gizarte etxeetan ematen diren euskara ikastaroak egiteko. Aspaldi sortutako ekimena da eta hiriko hainbat talderi zuzentzen zaie: eskola adinean dauden seme-alabak dituzten gurasoak, 55 urtetik gorako pertsonak, merkataritzako eta ostalaritzako langileak, atzerritarrak, udal langileak, etabat.

Gurasoentzat zuzendutako ikastaroak 140 ordu izango ditu, ikasturtean zehar banatuta; astean hiru saio emango dira, ordu eta erdikoak. Ostalaritza eta merkataritzako langileentzako ikastaroak hastapenekoak izango dira; 60 ordu iraungo dute, eta astean ordu eta erdiko hiru saio emango dira. 55 urtetik gorakoentzako ikastaroak ere oinarrizko mailakoak dira; 90 ordu iraungo dute, astean ordu eta erdiko bi saiotan banatuta. Atzerritarrentzako ikastaroak 60 ordu iraungo du, astean bi orduko hiru saiotan banatuta. Udal langileek, berriz, astean 60 minutuko eskola izango dute.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?

Izan zaitez ALEAkide