Genero indarkeria

Bi gizon atxilotu dituzte bikotekideak jazartzeagatik eta jipoitzeagatik

Bi gizon atxilotu dituzte bikotekideak jazartzeagatik eta jipoitzeagatik

Salburua eta El Pilar auzoan jazo dira erasoak.

26 urteko gizonezko bat atxilotu zuten udaltzainek, otsailaren 2an, larunbatean, bere bikotekide ohiarenganako zuen babes-agindu bat urratzeagatik. Halaber, 28 urteko beste gizonezko bat atxilotu zuten otsailaren 4an, astelehenean, Salburuko bere etxebizitzan, bikotekidea jotzeagatik

Lehen atxiloketa, biktimak egindako salaketaren ostean egin zuten udaltzainek. Izan ere, emakumeak udaltzainei eskatu zien El Pilar auzoko bere etxebizitzara joan zitezela, bikotekide ohiak bertaraino jarraitu ziolako. Leku horretara joan zen patruilak berretsi zuen babes-agindu bat indarrean zuela gizonezkoak, eta  hainbat aldiz  bikotekide ohiari deitu ziola telefonoz. 

Bigarren eraso matxista Salburuko etxebizitza batean jazo zen. Udaltzaingoaren oharraren arabera, bikote baten arteko eztabaida baten berri jaso zuten 092 telefono-zenbakian, eta etxebizitzako gela batean giltzaz itxitako emakume bat aurkitu zuten, gizonarengandik ihesi, eta irainak eta kolpeak jaso ondoren.

Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide