Gorka Urtaran Gasteizko alkateak sare sozialetan aurreratu du albistea: "Aranburutarren kaleak espazio hondatu eta hutsa izateari utziko dio laster, eta etxebizitza, familia eta aukera berriak hartuko ditu. Gainera, Judimendi auzoak ere leku bat irabaziko du, adinekoentzako zentroa egiteko eta gizarte etxea handitzeko". Hogei urte behar izan ditu Udalak lurzoruaren jabeekin, eta eraikinen sustatzaileekin ados jartzeko.
Azkenean, familia bakarreko bi altuerako zortzi etxebizitza eraikiko dituzte bertan, etxebizitza-bloke bat ere lau solairu eta atikoa izango dituena, eta Judimendiko gizarte-etxearen ondoan, udal eraikinak jasoko dituen beste eraikin bat. Alkateak zehaztu duenez, gizarte-etxea handitzeko edo adinekoen zentro berri bat kokatzeko erabiliko dute aipatu eraikina.
Iragan astean tramitatu zen Hirigintza Antolamendurako Plan Orokoarren moldaketa, eta hurrengo egunetan aurkeztuko dute egitasmoa udalbatzan. Gainerako talde politikoen babesa izatea espero du Urtaranek aurrera egiteko.