Atzo eguerdiko ordu batean gerturatu dira Udaltzaingoko eta Ertzaintzako agenteak Gasteizko Alde Zaharreko Pintore kalera, Bouchra izeneko emakumeak eta haren zazpi urteko semeak etxea utzi behar zutela zioen aginduarekin. Iritsi direnerako, baina, poliziek hutsik aurkitu dute etxebizitza, emakumeak ordubete lehenago pisuko giltzak entregatuta zituelako.
Bouchrak sei urte zeramatzan bertan bizitzen, baina jabeak ez dio alokairua berritu nahi izan, hilabetero ordaintzen zion arren. Etxeko berokuntza ere aspaldi apurtuta zuela salatu du Kaleratzeak Stop Araba elkarteak, baina jabeak ez omen zion erantzuten emakumeak egindako deiei.
Udal aterpera jo behar izan dute bertan gaua pasatzeko. Indarkeria matxistaren biktima da emakumea, eta ez du jasotzen bikotekide ohiak eman behar zion diru-laguntza. Horrez gain, Bouchrak epilepsia duela azaldu dute.
Kaleratzeen kontrako elkarteko kide Arturo Val del Olmoren esanetan, Etxebidek esan die halako kalteberatasun kasuetarako aurreikusita dagoen protokoloaren ezaugarri guztiak betetzen dituela kaleratutako emakumeak, baina, halere, oraindik ez dutela etxebizitzarik berari eskaintzeko.
Emakumea Harrera Sozialerako Udal Zentrora bideratu dutela azaldu dute, baina azpiegitura hori ume bat artatzeko modukoa ez dela iritzi diote elkartekoek. Gasteizko Udalak halako larrialdi egoeratarako etxebizitzak prest izan beharko lituzkeela babestu dute elkartekoek. Modu berean, zerbitzu sozialek afera honetan erakutsi duten "pasibotasuna" salatu nahi izan dute. Udalak udal zerbitzuetara jotzea baino ez diola eskaini salatu du Val del Olmok."Kaleratua izanez gero, maletarekin San Antonio kaleko udal larrialdi zerbitzuetara jotzeko esan zidaten", kexu mintzo da Bouchra.