Kosta ahala kosta Elvira Zulueta jauregian kokatu nahi du Gasteizko Udalak Arabako ardogintzaren zentroa. Hala, udal gobernuak gaur erabaki du proiektua berriro lizitatzea, eta argi azaldu du Gasteiz Arabako Errioxako sarrerako atea bihurtzea dela zentroaren xedea. Hirugarren aldia da zentroaren proiektua enkante-lehiaketara ateratzen dela. Aurreko bietan ez zen proposamenik aurkeztu.
Arabako Errioxatik etorri zaizkion kritikak ere albo batera utzi ditu Gasteizko udal gobernuak. Izan ere, Arabako Errioxako Lezako Mahaian bildutako lagunek aspaldi salatu dute Errioxa marka "bahitu" nahi duela Gorka Urtaran alkateak hiriburua sustatzeko, eta Gasteizko zentralismoa salatu dute.
Udalak iragarri duenez, planteatzen diren jarduera-programen kalitatea hartuko da kontuan bereziki proiektua gauzatzeko lehiaketara aurkezten diren proposamenak balioesteko orduan. Halaber, urtean gutxienez 34.532 euroko kanona ordaindu beharko du zentroa kudeatu nahi duenak.
Ardogintzaren zentroarekin batik bat Gasteizko alde turistikoa bultzatu nahi du Udalak: "Asmoa da nazioartean onarpen handia duen tokiko produktu bat nabarmentzea, upategiak eta ostalaritza babestea, eta produktu horren eskutik hiria bultzatu eta Gasteizen dinamizazio turistiko eta ekonomikoan laguntzea".