Memoria Gara ekimenak aditzera eman du Gasteizko gotzaiak, Juan Carlos Elizaldek, uko egin diola elkartearekin biltzeko eskaerari. "Elizbarrutia bezalako instituzio batek horrelako erabaki bat hartu izanak penatzen gaitu, ekimen herritarra eta anitza delako, aldarrikapen justua delako eta babes zabala duelako". Izan ere, ekimenak nabarmendu duenez dagoeneko change.org plataforman 2.000 sinaduratik gora jaso dituzte eta bederatzi sindikaturen babesa dute.
Bestetik, Memoria Gara ekimenak iragarri du abenduaren 1ean sinadurak biltzeko mahaiak jarriko dituela, eta eguerdian "mobilizazio originala, artistikoa eta parte-hartzailea" egingo dela San Frantzisko eliza inguratuz. Mobilizazioaren helburua da apezpikutzari eskatzea baimendu dezala Gasteizek leku hori memoriaren adierazgarritzat gordetzea. "Gure iritziz, elkarrizketarako borondatearekin herritarren eskaerari honi erantzun daiteke, eta gaur egun dagoen jaiotzen erakusketarako beste gune bat bilatu daiteke", esan dute plataformatik.