Gazte Klik-Klak gazteentzako argazki digitalen eta bideoen lehiaketan lanak jasotzeko epea ireki da. 14 eta 25 urte bitartekoentzako lehiaketan lanak aurkezteko aukera dago urriaren 16ra arte. Lanak argazki sortetan, bideo formatuan eta gif animatuetan aurkez daitezke.
Gasteizko Udalaren Gazteria Zerbitzuak antolatuta, hamargarren edizioa beteko du lehiaketak. Aurten, 'Kultura eta Hiria' lelopean, "elkarrekin lotutako toki aniztunak barne hartzen dituzten kultur adierazpenak eta hiria esploratu nahi ditugu. Nortasun anitzetatik sortzen den leku mestizoa, kultura eta sormena adierazteko eta hiri heterogeneoa sortzeko", adierazi dute antolatzaileek.
Irabazleen eta hautatuen lanak ikusgai izango dira ZAS Kulturgunean antolatuko den erakustaldi batean, abenduan. Katalogo bat ere egingo da ikusgai egongo diren lanekin. Erakusketan izango diren lanen artean lau parte hartzailek aipamen berezi bat jasoko dute. Hala, 300 euroko bono trukagarria eskuratuko dute argazki, bideo edo kultura materiala lortzeko, eta parte hartzeko aukera ere izango dute Tetrapack 2019 erakustaldian, martxotik aurrera.
Gazte Klik-Klak 2019 eta Tetrapack 2019ko edizioak Ibon Saenz de Olazagoitiak komisariatuko ditu, ZAS Kultur elkartearen izenean. Aurten, komisario lanetan Jennifer Custodiok lagunduko dio, 2015eko Tetrapackeko egileetako bat.
Informazio gehiago eta lehiaketaren oinarriak, hemen: www.vitoria-gasteiz.org/gazteria .