Arabako Errioxako Ardoaren Ibilbideak eta Gasteizko Azoka Plazak antolatuta, ardo zuriaren lehendabiziko azoka izango da asteburuan. Zuria ta Kitto proiektuak eskaintza enoturistikoa eta enogastronomikoa bultzatzea du helburu, eta Euskal Herriko 44 upategik hartuko dute parte: Arabako Errioxako 24, Bizkaiko txakolineko 6, Arabako txakolineko 4 eta Getariako txakolineko 10.
Ardo zuriaren eta txakolinaren azoka Urrezko Zeledoien plazan, Probintzia plazan eta Azoka Plazan ospatuko dute. Euskal Herriko 65 ardo zuri dastatzeko aukera egongo da, euskal produktuekin egindako jakiekin batera. Jardunaldietan zehar, dastatze publikoak antolatuko dituzte sektoreko profesionalen iruzkinekin; besteak beste, Mikel Garaizabal enologoa (ostiralean) eta Iñaki Suarez teknikari gastronomikoa (larunbatean) izango dira.
Musika ere ez da faltako. Gaur, Music Has No Limits taldeak kontzertu bat eskainiko du Azoka Plazako terrazan, 21:30etik aurrera. Bertan, koktel zerbitzua egongo da eta 0 kilometroko produktuak dastatzeko aukera ere izango da. Larunbatean, taldeak Foru plazan beste kontzertu bat eskainiko du 23:00etan.