Altraste Danza taldeak antolatutako Danzalava proiektuaren hirugarren edizioa hasiko da irailean, Gasteizen. Dantza garaikideko sortzaileentzat, eta batik bat emakume sortzaileentzat sostengu izatea eta mugimenduen hizkuntzan hausnartzea eta horretan trebatzea dira aurtengo edizioaren helburu nagusiak. Dantza garaikidearen munduan ibilbide azpimarragarria egiten ari diren profesionalek hartuko dute parte Danzalavan: Federica Porello, Mark Tompkins, Monica Valenciano, Vera Mantero, Katie Duck eta Idoia Zabaleta.
Hamaika hilabetez era guztietako ekimenak eskainiko dituzte dantza garaikidean aritu nahi direnentzat. Hala, dantzaren profesionalentzat zuzenduta egongo dira lantegiak, eta iraila, urria, urtarrila eta uztailean burutuko dira, bost eguneko iraupenarekin. Halaber, Danzalava proiektuak emakume sortzaile baten lana babestuko du, Azala espazioan egingo duen egoitzaren bitartez; sorkuntza prozesu horretan Idoia Zabaletaren laguntza koreografikoa izango du.
Halaber, publikoa sentsibilizatzea eta dantzara erakartzea proiektuaren parte garrantzitsua dira, eta honezkero gonbidatu dituzten koreografoek aurkezpen publikoak ere egingo dituzte, lantegiekin batera.