Guztira, 150 adinekorentzako tokia izango du Lakua-Arriaga auzoan Arabako Aldundia aurten eraikitzen hasiko den egoitza berriak. Mendekotasuna duten 25 adinekorentzat eguneko zentro bat izango du, eta beste 25 leku desgaitasun fisikoa dutenentzat. Arabako gizarte ekimeneko kooperatiba batek eraiki eta kudeatuko du egoitza, eta kooperatiba horrek eskainiko ditu adineko lagunentzako zerbitzuak.
Eguneko zentro berriak profil psikogeriatrikoa izango du; hau da, zaintza premia handiagoak dituzten eta dementziak edo alzheimerrak jota dauden adinekoentzat izango da, baliabide horrek baitu eskaririk handiena une honetan, zerbitzu hori eskatzen duten pertsonak gero eta nagusiagoak baitira eta arreta etxetik kanpo eskatzea erabakitzen baitute, etxean zaindu ezin direnean eta haien gaixotasunak oso aurreratuta daudenean.
Eguneko zentro berria martxan jartzen denean, Gizarte Ongizaterako Foru Erakundeak 457 plaza izango ditu.