"Artea eta parte-hartzea" uztartzeko xedea duen ARTgiak Txaro Marañon gasteiztarraren erakusketa jasoko du uztailaren 21ra arte. Itsasoa ureztatuz izeneko erakusketa zeramika-lanean oinarritzen da baina erabilitako objektuak eta beste elementu batzuk ere erabiltzen ditu.
Erakusketaren Plastikozko irla sailean lurreko lokatzaren eta plastikozko hondakinen arteko sinbiosia nabarmendu du egileak eta Simbiontes izeneko sailean, plastikozko elementu arraroak dituzten zintzilikatzeko eskulturei ere garrantzia eman die Marañonek.
Egileak zeramika-lanean erabat ezberdinak diren bi elementuen arteko elkarrizketa sortu nahi izan du: zeramika eta zerikusia ez duen beste elementu bat. "Nik neuk aztertu behar izan dut zergatik momentu batez erabaki dudan plastikoa lan-elementu gisa erabiltzea eta lokatzarekin batera landuko dudan materiala izatea", azaldu du artistak. Era honetara, egileak egindako urteetako ikerketak Ozeano Barearen zazpigarren kontinentera, plastikozko irla erraldoira, eraman du, urtero bost eta 15 milioi tona plastiko heltzen diren lekura. Hondartzan jaso dituen plastiko zatiak gaineratu ditu sinbionte bakoitza eratu duenean.