alea.eus

Indarkeriarik gabeko jai eredua aldarrikatu du mugimendu feministak

Esti Lanao 2018-06-07 13:06   Gizartea  Gasteiz

Azkena Rock jaialdia finantzatzeko diru zein espazio publikorik ez erabiltzea eta LGTBIQ kolektiboaren kontrako erasoak ekiditeko neurriak hartzea eskatu dio udalari mugimenduak.

Azkena Rock jaialdiaren eredua zalantzan jarri du Gasteizko Mugimendu Feministak gaur goizeko agerraldian. Prestakuntzaz arduratzen den enpresak, Last Tour International-ek, "helburu komertzialak" baino ez dituela salatu du mugimenduak. "Jaialdi elitista bat ari da bultzatzen, egoera prekarioan lan egiten duten langile askorekin, eta emakumeok lekurik ez dugun jai eredu bat bultzatuz", adierazi du Aitziber Romerok agerraldian.

Aurten oholtzara igoko diren 34 taldeetatik hiruk bakarrik dute emakumeren bat kideen artean mugimendu feministako kideek gogoratu duten moduan. Taula gaineko emakumearen presentzia aldarrikatu dute, eta haien kontrako indarkeriarik gabeko jai eredu baten beharra nabarmendu.

Era berean, "sormenean, parte hartzean eta komunitatean" eraikitako jai eredua aldarrikatu eta, besteak beste, Udalak LGTBIQ kolektiboaren kontrako erasorik eman ez dadin neurriak hartzea eta jaialdiak finantzatzeko diru zein espazio publikorik ez erabiltzea eskatu dute eragile feministek. "Finean, indarkerian sostengatuko ez den jai eredu bat".

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Izan zaitez ALEAkide.



Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa