alea.eus

LGTBI komunitatearen aurkako 15 eraso zenbatu dituzte azken urtean

Erredakzioa 2018-05-16 13:59   Gizartea  Gasteiz

2017ko apiriletik aurtengo apirilera bitartean sexu eta genero aniztasunaren aurka Gasteizen izandako 15 erasoren berri izan du Lumagorri elkarteak.

LGTBI komunitatearen aurkako 15 eraso zenbatu dituzte azken urtean
LGBTI komunitateak nozitutako erasoak salatu dituzte txostenean. / Lumagorri | Ikusi handiago | Argazki originala

Transbollomarika sareak jasotako salaketen bitartez izan da eraso horien berri, bai erasotuek zein eraso baten lekuko izan diren lagunek egindakoak. Gaur aurkeztu dute eraso horien inguruko informazioa biltzen duen txostena, Gasteizko Udaletxean.

Arlo anitzetan izan dira erasoak: hezkuntzan, aisialdian, familian edota lanean. Besteak beste, Hazte Oir elkarteko autobusa, Hizkuntza Eskola Ofizialeko irakasle batek egindako isekak, hamar pertsonak lagun baten kontra egindako eraso homofoboa edota lanean izandako jazarpena aipatzen ditu txostenak. Erlijioaren arloan ere izan dira erasoak: Gasteizko gotzainak eliztar bati gay izategatik parrokian ez aritzeko ezarritako debekua eta gazte musulman batek bereziki zenbait erlijiokideren partez izandako jazarpena aipatzen dira.

Txostenean salatu dutenez, "diskriminazioak sufritzen ditugu, eskubideak berdintasunean eta justizian gauzatzea eragozten dutenak: LGTBI  izateagatik  bakarrik  ez,  bai  eta  xenofobian  eta  arrazakerian oinarrituta izaten direnak ere".

Halako datuak Gasteizen argitaratzen diren aurreneko aldia da hau. Datuak ikusita, genero identitatearen eta sexu orientazioaren kontrako delituei buruzko behategi bat sortzeko beharra ikusten dute Lumagorri elkarteko kideek. Horrelako eraso asko epaitegietara edo instituzioetara iristen ez direla salatu dute. Adierazgarria da ofizialki jasotako salaketak: bi jaso ditu Udaltzaingoak. Gogoratu dutenez, 633 30 96 53 telefonora hots egin daiteke eraso hauek salatzeko.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Izan zaitez ALEAkide.



Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa