Asteburu honetan Gure Esku Dago-k grabatutako spotean parte hartu duten ehunka gasteiztarrei "esker ona" adierazi die herri mugimenduak, ohar baten bitartez. Ehunka boluntariok parte hartu dute asteburuko grabaketa lanetan, Gasteizko hiru kokagunetan: Aihotz plazan, Txagorritxun eta Salburuan. Era berean, arlo teknikoez arduratu diren profesionalei ere eskerrak eman dizkiote, "beren ekarpenik gabe egitasmo hau ezinezkoa baitzatekeen".
Antolatzaileen aburuz, spotaren grabaketak “ongi asko ilustratzen du mugimendu honek defenditzen dituen balioak: hiritarren partaidetza, jendearen ahalduntzea eta erabakitze eskubidea". Maiatzaren 14an zabalduko dute grabatutakoaren emaitza, sare sozialen bidez.
Ekainaren 10ean izango den giza katean 5.000 lagun biltzeko asmoa berretsi dute antolatzaileek, “jende zoriontsuz osatutako herri libre bat” eraikitzeko helburuan aurrera egiteko.