Atzeratu egingo dira Gasteiz Antzokiko lanak

Atzeratu egingo dira Gasteiz Antzokiko lanak
Eskoriatza Eskibel etxadian eraiki nahi dute Gasteiz Antzokia. / Alea

Eskoriatza-Eskibeleko etxadiko lorategian fuel-olioz beteta dagoen depositu bat agertu da, eta azterlan arkeologikoa eragotzi du. 

Gasteiz Antzokia eraiki aurreko azterlan arkeologikoek hiru hilabete iraungo zutela iragarri zuen Gorka Urtaran alkateak abenduan, baina atzerapena izango dute lanek.

Udaletik jakinarazi dutenez, fuel-olio astunez betetako depositu bat egon daiteke lorategian. "Gasteizko Udalak susmatzen du aipatutako sustantzia izan dezakeela barruan, eta pilotalekuko edo garai bateko ostatuko berokuntza sistemarako erabiliko zela. Ustekabea izan da aurkikuntza, ez baitzen plano eta agirietan agertzen, eta azterlan arkeologikoa egitea eragozten du". 

Jakinarazi dutenez, Udalak zenbait lan egingo ditu ezer erabaki aurretik. Lehenengo, aurkitu den osagaiaren kopurua aztertuko dute, eta horrek duen garrantzia. Deposituaren edukia ateratzeko, enpresa espezializatu bat kontratatu beharko dute: fuel-olioa berotuz likidotuko da, eta ondoren bertatik aterako dute. Horretaz gain, baliteke inguruan kutsatutakoa ere garbitu behar izatea, eta horrek traba gehiago ekarriko lituzke lan arkeologikoak egiteko, eta proiektua garatzeko hasiera batean aurreikusitako epeak luzatuko du.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide