alea.eus

FCCk Gasteizko garbiketa zerbitzua uzteko asmoa agertu du

Erredakzioa 2018-04-10 14:11   Ekonomia  Gasteiz

Udalak lizitazio berria egin beharko du orain, baina bertan FFC berriro garaile ateratzeko aukerak kezka eragin du oposizioan.

FCCk Gasteizko garbiketa zerbitzua uzteko asmoa agertu du
2023. urtera arte zegoen indarrean FCCk Gasteizko garbiketarako zuen kontratua. Irudia: Gasteizko Udala. | Ikusi handiago | Argazki originala

FCC eta GMSM enpresek osatzen duten aldi baterako enpresa-elkarteak Gasteizko garbiketa zerbitzua utziko du, Gorka Urtaran alkateak azaldutakoaren arabera. Udalak martxoaren amaieran izan zuen erabaki horren berri.

2023. urtera arte zegoen indarrean FCCk Gasteizko garbiketarako zuen kontratua, baina enpresaren eta Udalaren arteko tirabirak izan dira azken hilabeteotan, garbiketa zerbitzuari loturiko zenbait gastu noren ardura ziren ezin adostuta. Urtarrilean Euskadiko Aholku Batzorde Juridikoak ebatzi zuen enpresak hartu behar zuela gastu horien kargua. Urteko 1,7 milioi euroko gastua da hori. Orotara, kontratuak urteko 22,8 milioi eurokoa da. Antza, gainkostu hori izan da kontratua eteteko arrazoia.

Kontratu berria lizitaziora atera eta esleitu arte, FCCk izango du oraindik orain garbiketa zerbitzuaren ardura. Orain, Udalak lizitazio berria egin beharko du, baina, berez, FCC esleipen berrira aurkezteko moduan egongo litzateke. Enpresa bera prozesu horretan garaile ateratzeko aukerak hautsak harrotu ditu oposizioan.

EH Bilduko bozeramale Miren Larrionen esanetan, bidean egon daitekeen lizitazio berri horretan FCCk berriro ere aurkezteko aukera izatea, eta horrela diru gehiago irabazi ahal izatea, "lizuna" litzateke. "Zerbitzua modu zuzenean kudeatzearen aldeko apustua egiteko" garaia dela aldarrikatu du zinegotziak. Irabazi ere horren alde azaldu da. "Urtaranek egin duen kanpo kudeaketaren aldeko apustua akats larria da, Udalaren interesen kontra doalako, eta hondakinen birziklatzean laguntzen ez duelako", esan du taldeak, sare sozialen bidez. Ahal Dugu-k ere eskatu dio alkateari azaltzeko "norekin hitzartu duen alde bakarreko erabaki hau".

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Izan zaitez ALEAkide.



Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa