alea.eus

Faxismoari buruzko jardunaldiak egingo dituzte Errekaleorren

Erredakzioa 2018-04-03 13:50   Gizartea  Gasteiz

Larunbatera bitartean, zinema proiekzioak, autodefentsa tailerrak, hitzaldiak eta eztabaidak egongo dira.

Faxismoari buruzko jardunaldiak egingo dituzte Errekaleorren
"Faxismoaren gorakada" aztertuko dute Errekaleorren. | Ikusi handiago | Argazki originala

Ostegunean hasita eta larunbatera bitartean "faxismoaren gorakada" aztertuko dute Errekaleorren, Euskal Herriko Sare Antifaxistak antolatuta.

Gaiari buruz "erantzun erreal" bat eskaintzeko asmoa izan dute antolatzaileek. "Jakin badakigu ez dela orain berriki sortu den arazo bat". Historiara begira, faxismoaren adierazpenik argiena Hitlerren, Mussoliniren edota Francoren erregimenak izan direla gogorarazi dute, baina aldarrikatu dute horiek "icebergaren tontorra" besterik ez direla. Faxismoa "kapitalaren interes eta momentuko beharrizanei erantzuten dien mugimendu eta estrategia bezala" ulertzen dutela gaineratu dute herri mugimenduko kideek. "Kapitalak garaiz identifikatu ez diren mekanismoak martxan jartzen ditu muturreko egoera horretara iritsi baino lehen".

Besteak beste, zinema proiekzioak, autodefentsa ikastaroak, hitzaldiak, eztabaidak eta musika egongo dira jardunaldien harira.

"Oso garrantzitsua iruditzen zaigu, klase kontzientzia oinarri, egungo testuinguruan sortzen ari diren mugimenduak aztertzea, gure artean esperientziak partekatzea, eta eztabaidatzeko espazio formalak zein informalak sortzen hastea", gaineratu dute.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa