alea.eus

'Carmen' eta Shakespearetik abiatuta, maitasunaren labirintioan

Erredakzioa 2018-01-25 16:00   Kultura  Gasteiz

Olga Mesa eta Francisco Ruiz de Infanteren instalazio-multzoa aurkeztu du Artiumek. 

'Carmen' eta Shakespearetik abiatuta, maitasunaren labirintioan
Erakusketa lau gunetan banatu dute. / Artium | Ikusi handiago | Argazki originala

Fikziozko arketipo batetik –Carmen– eta egiazko beste batetik –Shakespeare– abiatuta, maitasuna jorratzen du Artiumek aurkeztu berri duen erakusketak. Era askotako instalazio eta bideo-instalazioen muntaketa konplexu eta labirinto itxurazkoarekin, maitasunari lotutako hainbat gai jorratzen dituzte bidean: sedukzioa, gatazka, deriba eta, azkenik, heriotza.

Olga Mesaren eta Francisco Ruiz de Infanteren proiektua ibilbide desberdineko bi artistaren elkarrizketaren eta aurrez-aurrekoaren emaitza da. Azaldu dutenez, asmoa izan da lurralde artistiko desberdinen mestizajearen bidez, harreman pertsonalen alderdi ugariren ikuspegi bat osatzea. Antzerkigile ingelesaren maitasun-sonetoak eta Bizeten operaren soinu iradokitzaileak dira abiapuntua, labirintoan murgiltzeko atea: "Proposamen hibrido bat da, maitasunaren eta giza-harremanen inguruko kontuak jorratzen dituena, haiek anplifikatzen, isilarazten edota areagotzen direna, teknologiaren bidez sortzen direnean".

Hilaren 26tik maiatzaren 1era arte izango da erakusketa, Artiumeko Iparra aretoan. Eta erakusketa egon bitartean, gainera, hainbat ekintza egingo dituzte egileek: performanceak, hitzaldiak eta eszena-muntaketak tartean. 

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Izan zaitez ALEAkide.



Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa