Gasteizko Alde Zaharrak horma-irudi berria estreinatu du, zehazki, San Frantzisko Javier kantoian, ur-biltegiaren parean. Fill-in-Culture taldearen lana da, eta #Kontrastafrika ekimenaren barruan dago kokatuta. Manuel Iradier elkarte afrikanistak eta Enrique Gomez fotokazetariak abian jarritako egitasmo honek giza eskubideak, sorkuntza artistikoa eta Afrika elkartu ditu, eta besteak beste, erakusketa bat antolatu dute Montehermoson. Sei gunetan dago banatuta; horietako bost zentzumenei eskainia. Izan ere, Afrikako herrialdeetako biztanle askok bizitako egoerak eta giroa berregin dituzte, ikusleak sentitu ditzan.
Azkeneko aretoan Kike Gomez fotokazetariak Afrikako kontinentean barrena egindako azken bidaietako argazkiak daude ikusgai. Horietako batzuk oinarri hartu dute Fill-in-Culture taldeko artistek, kaleko horma-irudia egiteko.
Erakusketa urtarrilaren 7ra bitartean izango da zabalik.