Gasteizen autobus elektrikoa ezartzeko proiektua osatu dute dagoeneko, eta 2018. urtearen hasieran lizitatuko dute, 42.850.000 euroko aurrekontuarekin. Finantzaketaren banaketari dagokionez, tranbiaren eraikuntzarako aurrera eramandako eredu bera jarraituko dute; hots, Jaurlaritzak %65a jarriko du eta Aldundiak eta Udalak %17,5a bakoitzak.
Bestetik, hiri barruko garraio sarea aztertu ondoren, TUVISAk bidaiari gehien dituen ibilbidea 2. linea (periferikoa) dela ikusi du; horrenbestez, linea hori aukeratu dute proiektua ezartzeko. Hala, autobus elektrikoak hamar kilometroko ibilbidea izango du, eta bertan, 24 geltoki jarriko dituzte, ohiko geltokiak egon diren kokalekuan. Gainera, itxaron beharreko denbora edo beste linea batzuekin dauden konexioen inguruko informazioa emango duten LCD pantaila handiagoak jarriko dituzte.
Berrikuntza bezala, geltokian bertan balioztatu eta erosi ahal izango dira bidaia-txartelak, eta baita Bat txartela ere. Era berean, Bat txartela autobus geltokiko, Mendizorrotzeko eta Bulebarreko geltokietan eskuratzeko aukera izango da.
Guztiz elektrikoak izango diren hamabi eta hemezortzi metroko luzera duten autobusak gehituko dira, bide-gurutzeetako semaforoetan lehentasuna izango dute eta errail erreserbatutik zirkulatuko dute.