alea.eus

Adinekoentzako ibilbide seguruak sortu dituzte

Erredakzioa 2017-11-17 10:13   Gizartea  Gasteiz

Pilar eta Landazuri auzoetan, pertsona nagusiek laguntza eskainiko dieten saltoki eta establezimenduak topatuko dituzte.

Adinekoentzako ibilbide seguruak sortu dituzte
Ibilbide segurua pegatina laranjekin dago seinaleztatua. | Ikusi handiago | Argazki originala

Pilar auzoan adinekoak lasaiago ibiliko dira hemendik aurrera, izan ere, lagungarriagoak eta irisgarriagoak diren ibilbide seguruak estreinatu dituzte. Bertan, laguntza eta tratu hurbila eskainiko dieten saltokiak eta bestelako establezimenduak aurkituko dituzte. Modu horretan, auzoa pertsona nagusientzako ingurune adiskidetsuago bihurtuko da. Ibilbide hauek adinekoen autonomia sustatzen dute, eta auzoko leku esanguratsuenetatik segurtasunez mugitzeko aukera ematen diete. Bidea pegatina laranjekin dago seinaleztatua (faroletan, bankuetan eta kalean), ibilbidea nondik doan adierazteko. Establezimentuetan, berriz, Euskadi Lagunkoia zigilua egongo da ikusgai. 

"Etxetik atera eta harremanak izatera gonbidatzen zaituzten inguru batean mugitu ahal izan zaitezten nahi dugu. Premiarik izanez gero nora jo dezakezuen jakitea nahi dugu", azaldu die Peio Lopez de Munain Gizarte Politiken Saileko zinegotziak Konstituzio plazan Pilarreko ibilbide segurua ezagutzeko bildutako pertsonei.

Pilar auzoko ibilbideaz gain, Landazuri inguruan beste bat diseinatu dute, eta adinekoek berek hartu dute parte bietan. Horiez gain, 23 erakundek lagundu dute; tartean, saltokiak, osasun zentroak, gizarte etxeak eta ikastetxeak. Prestakuntza-ikastaro bat egin ondoren, Euskadi Lagunkoia zigilua jaso dute.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa